Икона Божией Матери «Неупиваемая чаша» 

5/18 мая.

Молебное пение

о страждущих недугом винопития, наркомании, табакокурения.


Иерей: Благословен Бог наш всегда, ныне и присно и во веки веков.

Чтец: Аминь.

Слава Тебе, Боже наш, слава Тебе.

Царю Небесный, Утешителю, Душе истины, Иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.

Святый Боже, Святый Крепкий, Святый Безсмертный, помилуй нас. (Трижды)

Слава, и ныне:

Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.

Господи, помилуй. (Трижды)

Слава, и ныне:

Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.

Господи, помилуй. (12 раз)

Слава, и ныне:

Приидите, поклонимся Цареви нашему Богу.

Приидите, поклонимся и припадем Христу, Цареви нашему Богу.

Приидите, поклонимся и припадем Самому Христу, Цареви и Богу нашему.

Псалом 26.

Господь просвещение мое и Спаситель мой, кого убоюся? Господь защититель живота моего, от кого устрашуся? Внегда приближатися на мя злобующим, еже снести плоти моя, оскорбляющии мя и врази мои, тии изнемогоша и падоша. Аще ополчится на мя полк, не убоится сердце мое; аще востанет на мя брань, на него аз уповаю. Едино просих от Господа, то взыщу: еже жити ми в дому Господни вся дни живота моего, зрети ми красоту Господню и посещати храм святый его. Яко скры мя в селении своем в день зол моих, покры мя в тайне селения своего, на камень вознесе мя. И ныне се, вознесе главу мою на враги моя, обыдох и пожрох в селении его жертву хваления и воскликновения, пою и воспою Господеви. Услыши, Господи, глас мой, имже воззвах, помилуй мя и услыши мя. Тебе рече сердце мое: Господа взыщу, взыска Тебе лице мое, лица Твоего, Господи, взыщу. Не отврати лица Твоего от мене и не уклонися гневом от раба Твоего, помощник мой буди, не отрини мене и не остави мене, Боже, Спасителю мой. Яко отец мой и мати моя остависта мя, Господь же восприят мя. Законоположи ми, Господи, в пути Твоем, и настави мя на стезю правую враг моих ради. Не предаждь мене в души стужающих ми, яко восташа на мя свидетелие неправеднии, и солга неправда себе. Верую видети благая Господня на земли живых. Потерпи Господа, мужайся, и да крепится сердце твое, и потерпи Господа.

Слава и ныне: Аллилуиа, аллилуиа, аллилуиа, слава Тебе, Боже (трижды).


Мирная ектения:

Диакон: Миром Господу помолимся.

Лик: Господи, помилуй.

О свышнем мире и спасении душ наших, Господу помолимся.

Лик: Господи, помилуй.

О мире всего мира, благостоянии святых Божиих церквей и соединении всех, Господу помолимся.

Лик: Господи, помилуй.

О святем храме сем и с верою, благоговением и страхом Божиим входящих в онь, Господу помолимся.

Лик: Господи, помилуй.

О Великом Господине и отце нашем, Святейшем Патриархе Кирилле, и о господине нашем Высокопреосвященнейшем митрополите Ювеналии, и о господине нашем, Высокопреосвященнейшем архиепископе Григории, честнем пресвитерстве, во Христе диаконстве и о всем причте и людех, Господу помолимся.

Лик: Господи, помилуй.

О Богохранимей стране нашей, властех и воинстве ея, Господу помолимся.

Лик: Господи, помилуй.

О граде сем, (или о веси сей, или о святей обители сей), всяком граде, стране и верою живущих в них, Господу помолимся.

Лик: Господи, помилуй.

О благорастворении воздухов, о изобилии плодов земных и временех мирных, Господу помолимся.

Лик: Господи, помилуй.

О плавающих, путешествующих, недугующих, страждущих, плененных и о спасении их, Господу помолимся.

Лик: Господи, помилуй.

О еже не презрети смиренныя мольбы рабов своих имярек и избавити я от недуга винопития, наркомании или табакокурения, и спасительным страхом своим в чистоте, воздержании и правде души их соблюсти, Господу помолимся.

Лик: Господи, помилуй.

О еже призрети на рабов своих имярек, страждущих душею и телом, и разрешити их от уз смертоноснаго зелья, егоже ради связани суть и порабощени волею, да припадут к Богу в покаянии, и причасники благочестия будут, Господу помолимся.

Лик: Господи, помилуй.

О еже посетити рабов своих имярек посещением Святаго Своего Духа и избавити их от недуга винопития, наркомании или табакокурения, в них гнездящася, Господу помолимся.

Лик: Господи, помилуй.

О еже ниспослати на рабов своих имярек Духа премудрости и разума, всадити в сердца их страх Свой божественный, отгнати буесть и просветити ум, Господу помолимся.

Лик: Господи, помилуй.

О избавитися нам от всякия скорби, гнева и нужды, Господу помолимся.

Лик: Господи, помилуй.

Заступи, спаси, помилуй и сохрани нас, Боже, Твоею благодатию.

Лик: Господи, помилуй.

Пресвятую, Пречистую, Преблагословенную, славную Владычицу нашу Богородицу и Приснодеву Марию со всеми святыми помянувше, сами себе и друг друга, и весь живот наш Христу Богу предадим.

Лик: Тебе, Господи.

Яко подобает Тебе всякая слава, честь и поклонение, Отцу, и Сыну, и Святому Духу, ныне и присно и во веки веков.

Лик: Аминь.


Бог Господь, глас 4-й:

Бог Господь и явися нам, благословен Грядый во имя Господне.

Стих 1: Исповедайтеся Господеви, яко благ, яко в век милость Его.

Стих 2: Обышедше обыдоша мя и именем Господним противляхся им.

Стих 3: Не умру, но жив буду и повем дела Господня.

Стих 4: Камень, егоже небрегоша зиждущии, сей бысть во главу угла, от Господа бысть сей и есть дивен во очесех наших.


Тропарь, глас 4:

Скорый в заступлении един сый, Христе,/ скорое свыше покажи посещение страждущым рабом Твоим,/ и избави от недуг и страстей,/ и воздвигни их к жизни вечной в любви к Тебе,/ приведи их ко спасительному воздержанию,/ посети и направи их во еже пети Тя и славити непрестанно,// молитвами Богородицы, едине Человеколюбче.

Слава, и ныне, глас тойже:

Днесь притецем, вернии,/ к божественному и пречудному образу Пресвятыя Богоматере,/ напаяющей верных сердца/ небесною неупиваемою чашею Своего милосердия/ и людем верным чудеса показующей,/ яже мы видяще и слышаще/ духовно празднуем и тепле вопием:/ Владычице премилостивая,/ исцели наша недуги и страсти,/ молящи Сына Твоего, Христа Бога нашего,// спасти души наша.


Прокимен, глас 4:

Тамо бо рука Твоя наставит мя, и удержит мя десница Твоя.

Стих: Яко Ты создал еси утробы моя, восприял еси из чрева матери моея.


Апостол (1 Кор 3: 11-17)

Братие, основания бо инаго никтоже может положити паче лежащаго, еже есть Иисус Христос. Аще ли кто назидает на основании сем злато, сребро, камение честное, дрова, сено, тростие, когождо дело явлено будет, день бо явит, зане огнем открывается, и когождо дело, яковоже есть, огнь искусит. И егоже аще дело пребудет, еже назда, мзду примет, а егоже дело сгорит, отщетится, самъ же спасется, такожде якоже огнем. Не весте ли, яко храм божий есте, и Дух Божий живет в васъ? Аще кто Божий храм растлит, растлит сего Бог: храм бо Божий свят есть, иже есте вы.


Аллилуия, глас 4:

Помощь моя от Господа, сотворшаго небо и землю.

Стих: Изведи из темницы душу мою.


Евангелие от Луки (Лк 8. 26-39)

Во время оно, прешедшу Иисусу во страну Гадаринску, яже есть об он пол Галилеи. Изшедшу же Ему на землю, срете Его муж некий от града, иже имяше бесы от лет многих, и в ризу не облачашеся, и во храме не живяше, но во гробех. Узрев же Иисуса и возопив, припаде к Нему, и гласом велиим рече: Что мне и Тебе, Иисусе Сыне Бога вышняго? Молюся Ти, не мучи мене. Повеле бо духови нечистому изыти от человека: от многих бо лет восхищаше его: и вязаху его узы железны и путы, стрегуще его, и растерзая узы, гонимь бываше бесом сквозе пустыни. Вопроси же его Иисус, глаголя: Что ти есть имя? Он же рече: Легеон, яко беси мнози внидоша вонь. И моляху Его, да не повелит им в бездну ити. Бе же ту стадо свиней много пасомо в горе, и моляху Его, да повелит им в ты внити. И повеле им. Изшедше же беси от человека, внидоша во свиния, и устремися стадо по брегу в езеро, и истопе. Видевше же пасущии бывшее, бежаша, и возвестиша во граде и в селех. Изыдоша же видети бывшее, и приидоша ко Иисусови и обретоша человека седяща, из негоже беси изыдоша, оболчена и смысляща, при ногу Иисусову, и убояшася. Возвестиша же им видевшии, како спасеся бесновавыйся. И моли Его весь народ страны Гадаринския отити от них, яко страхом велиим одержими беху. Он же влез в корабль, возвратися. Моляшеся же Ему муж, из негоже изыдоша беси, да бы с Ним был. Отпусти же его Иисус, глаголя: Возвратися в дом твой и поведай, елика ти сотвори Бог. И иде, по всему граду проповедая, елика сотвори ему Иисус.

 

Ектения сугубая

Диакон: Помилуй нас, Боже, по велицей милости Твоей, молим Ти ся, услыши и помилуй.

Лик: Господи, помилуй, трижды.

Еще молимся о Великом Господине и отце нашем Святейшем Патриархе Кирилле, и о господине нашем Высокопреосвященнейшем митрополите (или архиепископе, или епископе) (имярек), и о всей во Христе братии нашей.

Лик: Господи, помилуй, трижды.

Еще молимся о Богохранимей стране нашей, властех и воинстве ея, да тихое и безмолвное житие поживем во всяком благочестии и чистоте.

Лик: Господи, помилуй, трижды.

Не хотяй смерти грешных, но еже обратитися и живым им бытии, пощади и помилуй рабов твоих имярек, прежде даже не умрети им безгодно лютою смертию от губительнаго зелия винопития, наркомании или табакокурения, вразуми их, да уразумеют, яко сие от дьявола есть, иже, яко лев рыкая, ищет кого погубити. Но предвари, Господи, и спаси их, яко связани суть страстию, помози им востати на путь благочестия во спасение, молим Ти ся, Всемилосердый Господи, услыши и помилуй.

Лик: Господи, помилуй, трижды.

Призри, Господи, милостивно на рабов Твоих имярек, прельщенных лестию чрева и плотскаго веселия, даруй им познати сладость воздержания в посте, и проистекающих от него плодов, молим Ти ся, услыши и помилуй.

Лик: Господи, помилуй, трижды.

Еще молимся Ти, Господу Богу нашему, о еже услышати глас молитвы нашея, и пощадити и помиловати рабов Твоих имярек, простити им всякое прегрешение вольное и невольное, показати на них великую Твою милость, и избавити их от всякия зависимости и насилия диавола, и помиловати их, рцем вси, Господи, услыши и помилуй.

Лик: Господи, помилуй, трижды.

Ангельскими руками верховнаго ученика, Господи, из темницы божественною силою иногда изведый, избави рабов Твоих имярек, люто страждущих от недуга винопития, наркомании или табакокурения, рцем вси, Господи, услыши и помилуй.

Лик: Господи, помилуй, трижды.

Еще молимся о милости, жизни, мире, здравии, спасении, посещении, прощении и оставлении грехов рабов Божиих братии храма сего.

Лик: Господи, помилуй, трижды.

Услыши ны, Боже Спасителю наш, упование всех концев земли и сущих в мори далече, и милостив, милостив буди, Владыко, о гресех наших, и помилуй ны: милостив бо и человеколюбец Бог еси, и Тебе славу возсылаем, Отцу, и Сыну, и Святому Духу, ныне и присно, и во веки веков.

Лик: Аминь.


Молитва

Владыко Господи, сотворивый человека по образу Твоему и по подобию, избави создания Твоя от работы вражия, отверзи их очи мысленная, сопрязи животу их ангела светла, избавляюща их от всякого навета сопротиволежащаго. Услыши прибегающих к Тебе в скорби и печали, одержимых пагубною страстию винопития, наркомании, табакокурения. Не отврати от призывающих Тя лице Твое, даждь им крепость, надежду, веру, мужество, произволение, дар рассуждения и приведи их ко спасительному воздержанию. Попали, Господи, терние всех согрешений их, вольных и невольных, и да вселится в них благодать Твоя, просвещающая, опаляющая и очищающая всего человека. Исцели их от тяжкаго недуга винопития, наркомании, табакокурения, свободи от темнаго духа нетрезвенности, упрямства и нераскаянности, утверди их, слабых, даруй им, немощным, крепостьи силу благую, пошли им здравие душевное и телесное, направи их на путь трудолюбия и жизни в Тебе, Боже. Услыши, милостивый Господи, вопли родителей их и сродников, приими молитвы нас, плачущих, о чадех и близких наших. Твое бо есть, еже миловати и спасати ны, Боже наш, и Тебе славу возсылаем, Отцу, и Сыну, и Святому Духу, ныне и присно, и во веки веков. Аминь.


Молитва иная

Господи Боже наш, к Тебе припадаем и смиренно молим Тя, призри на землю Русскую, отведи губительный бич, поражающий наипаче невинных юношей и дев, к смертоносному зелью, сиречь наркотиком, страсть имущих Инии же вред себе творят, вину много внимающе. Праведно Ты, Господи, навел еси наказание сие на землю Русскую, за отступление от веры и за беззакония, но ныне прибегаем к Тебе с покаянием и просим: премени Твой праведный гнев на милость и избави страны наша от сего губительного поветрия. Возбрани, Господи, безсердечным людям, иже корысти ради разносят сие смертоносное зелие, совести не имуще, ниже страха Божия, не разумеюще, кую участь ближнему и себе уготовляют. Вразуми их, да уразумеют, яко Ты еси Господь Бог, праведныйСудия, воздаяй коемуждо по делом его, да отступят от сего безрассудного делания, и станут на путь честнаго трудолюбия. Призри, Господи, на рабов Твоих имярек, иже неверия ради, легкомыслия и небрежения ставшия жертвою пагубнаго зелия винопития, наркомании, табакокурения, яко не мощи им своею волею престати, порабощения ради. Помози им, Господи, противостати сим страстем, укрепи их волю и благое помышление, да свободившеся от рабского недуга, познают милость Твою и прославят Тя, и станут на путь спасения. Аминь.


Стихира, глас 6.

Днесь Владычицы чудотворная икона прославляется, / днесь вернии на молитву пред нею отовсюду собираются, / днесь и маловернии помыслми покаяния озаряются, / силы Небесныя о славе Пречистыя радуются, / мы же, яко Ангелом научихомся, тако вопием: / радуйся, Благодатная, Господь с Тобою, / благословена Ты в женах, / благословено Твое к нам милосердие, // благословен Плод чрева Твоего, слава Тебе.